Kurumi吊腳要睇醫生

2014年4月19日 (星期六) 復活節假第二日

Kurumi由細到大間唔中都會吊下腳，但最近兩個星期右後腳吊得好密，感覺好唔妥，所以帶佢去睇醫生。

醫生檢查完話左右後腳都3級要做手術，左腳比右腳嚴重(上年睇醫生，醫生都係話小mi左後腳最鬆的)，但懷疑右腳除咗移位之外，可能十字韌帶破裂，照咗兩張x-ray決定先咗右後腳(醫生唔建議同一時間做兩隻腳)，因為十字韌帶要開刀睇先知有無破裂，所以先做右後腳，如果開刀後見到十字韌帶破裂咗就即時做人工十字韌帶替代手術。

短短一年時間，小mi兩腳突然變得咁嚴重，真係好心痛。

我同爸爸好快就決定做手術，因為既然都要做，就唔想拖到佢年紀再大先做，因手術風險又會提高。

話就話做姐，但又估唔到21號，姐係後日就有期做，一時間心理未能調節未準備好咁，太突然了，不過咁快有期其實係因為原本醫生放假的，但如果我地決定做手術，醫生就唔放假。

已經決定做手術就要好好準備，手術前一日同小mi沖涼剷腳板底毛，洗床仔，等小mi回家有乾淨床仔訓。