第一次面試幼稚園

2013年10月12日 （星期六）

小蕾：今日係我第一次去幼稚園面試既日子，由於面試時間係15：15﹣15：30，係我午睡時間，所以媽媽安排我一早出街食早餐倦倦地，回家就可以早些睡一睡，抖足精神去面試。

食早餐地點依舊係飯堂。

媽媽：我禽日同小蕾講，聽日媽媽同你兩個人出街玩（面試）好唔好？

小蕾：星葵？爸爸？小mi? Shiro？

媽媽：唔帶佢地喇！只係帶小蕾出街，我地兩個去shopping。

小蕾：唔要，唔好，要一齊出街。

媽媽：好，我地一朝早全部一齊出街食咗早餐先，之後再同小蕾兩個出街，好唔好？

小蕾：好。

原來係小蕾心中，即使佢好鐘意出街玩sir滑梯，shopping，但都唔及全家人一齊出街，簡簡單單去飯堂食早餐咁開心。

星葵去到飯堂訓醒咗，但無喊，乖乖望住我地食早餐。

今日天氣好熱，小蕾頭髮濕晒。

有得出街，即使係出得一陣，但小mi Shiro已經好開心。每次睇見其他朋友仔可以成日帶毛小孩周圍去，我同爸爸都只能說句：「有心無力」。＞＿＜

其實小蕾禽日開始流鼻水，回家後仲發埋燒，即刻比藥佢食，訓一陣抖下。

訓咗2個鐘後，精神晒，我地就出發去面試。

15：00去到學校，出發前我同佢講我地去玩sir滑梯，因為上星期帶埋小蕾拿表時，佢想玩（係學校入面），但多人排隊未玩到。

所以係路程中，佢不停話玩sir滑梯。

但一入到學校，流程好急，補交資料就即刻帶我地去課室門口等，途中見到sir滑梯，小蕾話要玩，我只好同佢講：你答晒老師問題，我地就去玩。小蕾好乖話：好。

係課室門口一坐低，又即刻話入得去。

面試形式：

枱上放咗好多玩具，老師坐對面，小蕾要坐左邊，我坐右邊。

一入到課室，小蕾已經好開心拿住bear公仔同我講有bear bear。

（坐低後）

老師：（拿住bear）小朋友，你好呀﹗我係bear bear，我地握下手呀！

小蕾：同bear握手。

老師：你叫咩名呀？

小蕾：我叫鄧小蕾

老師：小蕾，枱上面呢個（鴨）係咩黎架？

小蕾：duck duck

老師：係喎﹗duck duck，咁邊隻duck duck 大d，你攞比我呀！

小蕾：攞大隻比老師

老師：duck duck眼睛係邊度？咀咀係邊到？

小蕾：指岩眼睛和咀咀。

老師：咁你既咀咀係邊度？

小蕾：指住自己咀咀。

老師：鼻子呢？

小蕾：（擬惑，因為佢未聽過鼻子，然後老師講鼻鼻，佢就即刻指鼻鼻。）

老師：眼睛呢？

小蕾：指住自己眼睛。

老師：（藍仔入面有車同積木）小蕾，你將車車攞去另一個藍仔到，積木放係呢個藍仔。

小蕾：（做岩了）

老師：（拿一張有好多水果的卡）小蕾，你鐘唔鐘意食生果架？鐘意食咩生果呢？

小蕾：鐘意，只識笑，未講係咩生果。

老師：（接住問），呢個（蘋果）係咩黎架？

小蕾：Apple

老師：呢個（香蕉）呢？

小蕾：Banana

老師：Banana係咩顏色架？

小蕾：yellow

老師：你鐘唔鐘意食呢個（西瓜），係咩黎架？

小蕾：鐘意，西瓜。

老師：咁呢個（士多啤梨）係咩？

小蕾：士多啤梨

老師：呢度有積木（好大發泡膠積木），你幫我搭高佢呀！

小蕾：（搭高咗）

老師：問完小朋友，我想問家長，請問你係朋友介紹呢間學校定係網上睇？

媽媽：網上睇

老師：請問你住邊？

媽媽：元朗

老師：問完喇！結果會係11月尾以郵寄方式寄去你屋企通知你。

面試結束後，老師奬咗一粒糖比小蕾，出課室後，小蕾經過sir滑梯話要玩，但原來欄住了，唔比玩，無奈同小蕾講，今日唔玩得，老師欄住咗。

由入學校到出學校只係用咗唔夠10分鐘，雖然面試問咗好多問題，但老師問得好急速，好彩小蕾都答得快。

小蕾今日既表現比我如期中好，小蕾係屋企係不停講野好多野講，但一出到街就變咗一個怕羞妹，見到陌生人唔肯講野，就算肯講都係蚊滋咁細聲，估唔到佢今日肯講野，仲答岩晒問題，做岩晒指令，真係嚇咗我一跳。（可能佢真係好想玩sir滑梯，諗住快d答完就有得玩，哈哈哈﹗）

以下張相，小蕾食緊粒糖。

見小蕾今日表現咁好，經過百佳，奬佢一包Elmo飲品。^^

希望in心儀學校時，小蕾可以保持水準喇！